မဟာသက္ကရာဇ်၁၀၃ခုနှစ်၊ (BC-588)တွင် ဂေါတမဗုဒ္ဓမြတ်စွာ ဘုရား အဖြစ်သို့ ရောက်တော်မူ ပြီးနောက် သတ္တသတ္တာဟ (၇)ဌာနတွင် လှည့်လည် စံမြန်းတော်မူစဉ် ဥက္ကလာတိုင်းမှ တဖုဿနှင့် ဘလ္လိကအမည်ရှိ ကုန်သည် ညီနောင်တို့သည်ပျားမုန့်ဆွမ်းတို့ကို ဆက်ကပ်လှူဒါန်းကြ၏။ ထို့နောက်ဘုရား ရှင်ထံမှဘုရားရှင် ကိုယ်တိုင်ပေးသနားတော်မူသော ဆံတော်မြတ်ရှစ်ဆူကို ပင့်ဆောင်လျက် ဥက္ကလာပတိုင်းသို့ပြန်လည်ရောက်ရှိခဲ့ရာ ဥက္ကလာပမင်းကြီး အမှူးပြုပြီး တိုင်းသူ ပြည်သားများက ကြိုဆိုပူဇော်ခဲ့ကြသည်။

ဥက္ကလာပမင်းကြီးအမှူးပြုသော ဥက္ကလာပတိုင်းသားများသည် ရှေးယခင် ပွင့်တော်မူပြီးသောကကုသန္ဓဘုရားရှင်၏ တောင်ဝှေးတော်၊ ကောဏာဂမန ဘုရားရှင်၏ ရေစစ်တော်၊ ကဿပဘုရားရှင်၏ ရေသနုတ်သင်္ကန်းတော်တို့နှင့် ဂေါတမဘုရားရှင်၏ ဆံတော်ရှစ်ဆူကို သိင်္ဂုတ္တရကုန်းတော်တွင် ဌာပနာ၍ ဉာဏ် တော်အမြင့် (၆၆)ပေ၊ (၄၄တောင်)- (၂၀မီတာ)ရှိသော ရွှေတိဂုံစေတီတော်ကို တည်ထားပူဇော်ခဲ့သည်။ ပွင့်တော်မူပြီးသော ဗုဒ္ဓဘုရားလေးဆူတို့၏ ဓာတ်တော်၊ မွေတော်များ ကိန်းဝပ်ရာစေတီ ဖြစ်သောကြောင့် လေးဆူဓာတ်ပုံ ရွှေတိဂုံစေတီတော် ဟု ဘွဲ့အမည်ရသည်။

ရွှေတိဂုံစေတီတော် ဘဏ္ဍာတော်ထိန်း ဂေါပကအဖွဲ့သည် သာသနာတော်(၃)ရပ်တွင် ပရိယတ္တိ သာသနာတော်ကို ချီးမြှောက်သောအားဖြင့် မြန်မာနိုင်ငံအစိုးရ အသိအမှတ်ပြုပရိယတ္တိစာမေးပွဲတို့တွင် တစ်ခု ပါဝင်သော စေတိယင်္ဂဏပရိယတ္တိဓမ္မာနုဂ္ဂဟစာလျှောက်မေးပွဲကို နှစ်စဉ်နတ်တော်လတွင် ကျင်းပပါသည်။ စာလျှောက်မေးပွဲကို သီးခြားစာသင်တန်း၊ သီးခြားစာချတန်းဟု နှစ်ဆင့်ခွဲကျင်းပပြီး စာသင်တန်း ဝင်ရောက် ဖြေဆိုမည့် ရဟန်းတော်များကို သက်တော် (၂၀)နှစ်မှ (၃၀)နှစ် အတွင်းသတ်မှတ်ထားရှိပြီး ဒွေမာတိကာ၊ သဒ္ဒါကြီး၊ ပုဒ်စစ်၊ သုတ်စစ်၊ သဒ္ဒါငယ်၊ ဆန်း၊ အဘိဓာန်၊ သင်္ဂြိုဟ်၊ ယမိုက်အောက်ငါးကျမ်းတို့ကို နှုတ်မေး(အာဂုံပြန်) ဖြေဆိုကြရပါသည်။ အာဂုံအောင်မြင်သော သံဃာများသာ ရေးဖြေဆက်လက် ဖြေဆိုခွင့် ရရှိပါသည်။
သီးခြားစာချတန်းကို သက်တော်(၃၅)နှစ်အထိသာ ဖြေဆိုခွင့်ပြုပြီး ပါရာဇိကဏ် အဋ္ဌကထာ၊ သီလက္ခန်အဋ္ဌကထာ၊ အဋ္ဌသာလိနီအဋ္ဌကထာ၊ အထက်ယမိုက် (၅)ကျမ်း၊ ပဋ္ဌာန်းကျမ်းများကို သဘောရေးဖြေ ဖြေဆိုကြရပါသည်။
စာသင်တန်းအောင် သံဃာတော်ကို စေတိယင်္ဂဏအဘိဝံသ အသိအမှတ်ပြုလက်မှတ်နှင့် စာချတန်း အောင်သံဃာတော်ကို စေတိယင်္ဂဏ ပရိယတ္တိဓမ္မာစရိယဂဏဝါစကဘွဲ့ တံဆိပ်တော်များကို ဆက်ကပ် ပါသည်။ စာသင်တန်းအောင်ပြီး နှစ်မခြားဘဲစာချတန်းကို တစ်နှစ်တည်း (၃)ကျမ်းလုံး အောင်မြင်ပါက “ဝဋံသကာဘွဲ့”ကိုဆက်ကပ်ပါသည်။